Daily Archives: February 10, 2020

JAMII IMETAKIWA KUFAHAMU SHERIA ZA NCHI YAO ILI KUEPUKA KUINGIA MATATANI.

Waziri wa Katiba na  Sheria Zanzibar Mh.Khamis Juma Mwalimu  ameitaka Jamii kufahamu  Sheria za Nchi yao ili kuepuka kuingia katika matatani.

Akizungumza katika  Uzinduzi  wa Maonyesho ya siku ya Sheria  Zanzibar yaliofanyika Viwanja vya  Mnazi  mmoja  Mh.Khamisi amesema Nchi yoyote haiwezi kuendeshwa  bila  ya Sheria kwani bila ya kuwepo Sheria makosa ya uhalifu na uvunjifu wa amani yataongezeka na kuifanya Nchi isikalike.

Amesema Vijana wengi hivi sasa wanajiingiza katika  suala, la  Dawa za kulevya ambalo ndio chimbuko la  kuondezeka kwa vitendo  viovu ukiwemo uhalifu na udhalilishaji .

Jaji Mkuu wa  Zanzibar Mh.Omar  Othmani Makungu  amesema lengo la Maonyesho hayo ni kutoa fursa  kwa  Wananchi kupata  Elimu ya Sheria kwani ni muhimu kwa Jamii kuifahamu.

Siku ya Sheria Zanzibar   hufanyika kila  Mwezi wa Februali ya kila Mwaka ambapo kauli mbiu ya Mwaka huu  inasema dumisha utawala wa Sheria na Demokrasia  katika Uchaguzi Mkuu 2020.

 

WANANCHI WA ZANZIBAR WAMETAKIWA KUYALINDA MAPINDUZI YAO KWA KUHAKIKISHA CCM INABAKI MADARAKANI

Spika wa Bunge la Jamhuri  ya Muungano wa Tanzania Mhe. Job Ndugai amewataka Wananchi wa Zanzibar kuyalinda Mapinduzi yao kwa kuhakikisha CCM inabaki Madarakani kila unapofanyika Uchaguzi.

Spika ameeleza hayo katika Hafla ya kuweka  Jiwe la Msingi la Tawi la CCM  Mwera  Kiongoni  eneo alilozaliwa Muasisi wa Mapinduzi  ya Zanzibar hayati Abeid Amani Karume na Mkutano  wa  Wana CCM uliofanyika Ukumbi wa Dr, Ali Mohammed Shein  huko Tunguu.

Amesema kuiondoa  CCM  Madarakani ni sawa na kuyakataa Mapinduzi na matunda yake ikiwemo Elimu bure na Afya.

Mkuu wa Mkoa Kusini Unguja Mh. Ayoub Mohammed Mahamoud amewataka Wana  CCM  wa Mkoa huo kuendeleza sira ya Mkoa wa Kusini kuwa ni Ngome ya CCM.

Katika hatua nyingine Chama cha  Mapinduzi  Wilaya  Mjini kimefanya zoezi la kupandisha Bendera katika Nyumba za Mabalozi wake wa Jimbo la Raha Leo kwa ajili ya kuadhimisha Miaka 43 ya Kuzaliwa   Chama hicho na kujipanga kuukabili Uchaguzi  Mkuu wa Mwaka  huu.

IDARA YA MSAADA WA SHERIA IMEBAINI ONGEZEKO KUBWA LA MAHABUSU KATIKA CHUO CHA MAFUNZO KINUA MGUU

Idara ya Msaada wa Sheria Zanzibar imefanya ziara maalum katika Chuo Cha Mafunzo Cha Kiinua Miguu na kubaini ongezeko kubwa la Mahabusu waliokosa dhamana kutokana na sababu mbali mbali.

Chuo hicho kina karibu ya Mahabusu 370  ikilinganishwa na Wafungwa 141 ambapo wingi wa Mahabusu hao wanatuhumiwa kwa  makosa ambayo hayana dhamana Kisheria na kusababisha Gharama kubwa  za  kuwahudumia.

Baadhi  ya  Watendaji wa Taasisi  za  Kisheria wakitoa tathmini ya Ziara hiyo baada  ya  kuwasikiliza Mahabusu na  Wanafunzi  wanaoendelea  na  Adhabu  zao wameshauri kufanyiwa Tathmini ya Kisheria ili kurahisisha utoaji Dhamana .

Mwanasheria Mkuu wa Chuo Cha Mafunzo SSP Seif Maabadi Makungu ametoa ufafanuzi wa baadhi ya malamiko yaliyotolewa na Mahabusu na Wanafunzi wa Chuo hicho na kueleza kuwa wanafanya kazi kwa kuzingatia haki za Bianaadamu.

Akitoa majumuisho ya Mkurugenzi wa Idara ya Wasaidizi  wa Kisheria Zanzibar Hanifa  Ramadhani amesema ni lazima Watendaji wa Sheria kujitathmini katika usimamizi wa Sheria ili kuwasaidia Watuhumiwa na Wanafunzi waliokuwemo katika Vyuo Vya Mafunzo kwani baadhi wamekuwepo ndani kwa sababu ya kutokufahamu Sheria za kuwalinda.

Ziara  hiyo inaenda sambaba na  Maadhimisho  ya Wiki ya huduma ya  Sheria imewashirikisha Watendaji kutoka Ofisi ya Mkurugenzi wa Mashtaka Mahakama Mwanasheria Mkuu Wasaidizi wa huduma zaSsheria na Kituo cha huduma za Sheria Zanzibar.

error: Content is protected !!